القاهرة 30

مش عارف كأني أول مرة بأشوف الفيلم ده .. إيه ده ؟؟ .. هو كنت أهبل أوي كده و أنا صغير و لا دلوقتي اللي بقيت أهبل ... مش عارف .. بس أنا بقيت شايف الفيلم بطريقة غريبة أوي ... زمان كنت بأشوفه كأنه قصة واحدة باعت نفسها بسبب الفقر لواحد غني كنت متضايق منه جدا بسبب الإفترا اللي هو فيه( و كمان كنت بقول يا بخته ... سعاد حسني بقى ) و الست دي متجوزه واحد خ....تيييييت ..ل اسمه محجوب عبد الدايم قبل انه يطلعله قرون عشان يقدر يوصل و كان المتهم الأساسي في كل القصة من وجهة نظري ساعتها هو الفقر اللي دفع الاتنين لكده بالتعاون طبعا مع افترا الراجل الغني ..أما دلوقتي فأنا شايفه حاجة تانية خالص و مش عارف إذا كان العبقري نجيب محفوظ كان يقصد كده و لا إيه .. صحيح أنا عارف إن نجيب محفوظ قال قبل كده إن فن الرواية في منتهى المكر لأنه بيخلي الكاتب يقول اللي هو عايزه من غير ماحد يمسك عليه حاجة ... بس مش عارف قصده الحقيقي من القصة ايه .. بس أنا هنا هأشرحلكوا اللي فهمته آخر مرة شفت فيها الفيلم ..يمكن تكونوا انتوا كمان فاهمين كده من زمان و يطلع انا اللي فهمي بطئ.
بصوا بقى اللي فهمته .. أو بلاش اللي فهمته .. اللي لاقتني شايفه قدامي فجأة و أنا باشوف الفيلم .. لقتني شايف سعاد حسني كأنها مصر .. آه و الله .. مصر اللي كانت بتحب واحد اسمه علي طه و نفسها تدي كل خيرها لحبيبها ... و لقتني شايف علي طه ده كأنه كل مثقفين و شرفاء هذا البلد اللي حبهم للبلد دي و دفاعهم عنها بنفس طريقة حب علي طه لسعاد حسني في الفيلم كلام بس بدون أفعال ... شايفها بتضيع منه .. شايف أبوها هيبعها بسبب الفقر و كل اللي عند حبيبها كلام و بس ..( بالظبط زي ما معظم المثقفين و المعارضة و هما بيدافعوا عن مصر ) و لقتني شايف جوزها في الفيلم هو بقية شعب مصر الفقرا الغلابة المطحونين ( الحقيقة أنا متعاطف جدا مع حمدي أحمد و مخنوق جدا من علي طه ) اللي قبلوا إن بلدهم تغتصب أو بلاش تغتصب تمشي على حل شعرها مع أحمد مظهر عشان يقدر يشتغل و يعيش و بس !! .. و أحمد مظهر هنا يمثل كل الأنظمة الحاكمة و حاشيتهم من أصحاب الأموال و النفوذ و السلطة ... يعني من الآخر أحمد مظهر هو النظام الحاكم ... حمدي أحمد هو احنا .. طه هو المعارضة ... سعاد حسني هي مصر ...
ده اللي أنا شوفته .. مش عارف بقى الكلام ده صحيح و لا كنت عايز أنام و لا إيه ... بس أنا بقيت أحسس على راسي كل شوية يمكن ألاقي قرون ... عموما حتى لو ماكانش عمنا نجيب محفوظ يقصد كده ... فده ما يمنعش إني شايف مصر بلدنا احنا ماشيه على حل شعرها مع الجماعة إياهم و احنا ساكتين و راضيين و مبسوطييين... يعني من الآخر احنا شوية خ...تييييييييتت لات .

أخيرا .. مش عارف مين صاحب إختيار سعاد حسني لهذا الدور و يا ترى الإختيار مقصود أم لا .. ؟؟ لبيان أن مصر دي جميلة جدا جدا بس احنا مش عارفين قيمتها ... يعني مش كان اختار ماجدة و لا أي حد تاني .. إنما تبقى سعاد حسني مراتك و لا حبيبتك و تبيعها كده ... ده كأن اللي اختارها قاصد تماما و كأنه بيلطم على حالنا.